Tá comhairliúchán poiblí ar Straitéis fadtéarmach Fuíolluisce na Gaillimhe seolta ag Uisce Éireann

Tá tús curtha inniu ag Uisce Éireann le comhairliúchán poiblí ocht seachtaine ar phlean fadtéarmach chun soláthar leordhóthanach seirbhísí fuíolluisce do réigiún Straitéis Fuíolluisce Chathair na Gaillimhe agus áiteanna i gContae na Gaillimhe a chinntiú. Déanfaidh Straitéis Fuíolluisce 50 Bliana na Gaillimhe measúnú ar an gcóireáil fuíolluisce agus ar an mbonneagar líonra go léir i gCeantar Cathrach na Gaillimhe, i gceantair Bhaile Átha an Rí agus Mhaigh Cuilinn chun a fháil amach cad iad na huasghráduithe a bheidh ag teastáil chun freastal ar riachtanais an daonra amach anseo, rud a chuirfidh fás eacnamaíoch, athruithe comhshaoil agus athrú aeráide san áireamh. 

Beidh Uisce Éireann ag dul i gcomhairle le raon leathan páirtithe leasmhara chun an measúnú cuimsitheach seo ar gach bonneagar atá ann cheana a chur chun cinn agus chun fís a leagan amach d'fhorbairt amach anseo. Tugtar cuireadh do dhaoine den phobal páirt a ghlacadh sa chomhairliúchán agus aighneacht a dhéanamh. Tá sé mar aidhm ag an straitéis a chinntiú go ndéantar soláthar leordhóthanach seirbhísí fuíolluisce a phleanáil agus a chur i bhfeidhm do thithe, do ghnólachtaí agus do thionscail ar fud an chontae.

Fáilteofar roimh aighneachtaí ó gach páirtí leasmhar ar feadh ocht seachtaine ón 26 Meán Fómhair go dtí an 20 Samhain 2024. Tá tuilleadh eolais agus sonraí faoi conas aighneacht a dhéanamh ar fáil ó shuíomh gréasáin tiomnaithe Uisce Éireann.

Dúirt Paul Fallon, Bainisteoir Punainne Uisce Éireann, "Tá comhairliúchán poiblí ar an dréachtstraitéis fuíolluisce ar siúl anois. Rachaidh an straitéis chriticiúil seo go mór chun tairbhe do na glúine atá ann faoi láthair agus do na glúine atá le teacht atá ina gcónaí agus ag obair i nGaillimh. Leagfar amach ann an chaoi a bhfuil sé beartaithe againn seirbhísí fuíolluisce agus bonneagar fuíolluisce a sholáthar do thithe agus do ghnólachtaí sna 50 bliain amach romhainn."

“Táimid ag iarraidh ar ár bpáirtithe leasmhara go léir agus ar an bpobal a dtuairimí a chur in iúl maidir leis an gcaoi a ndéantar na seirbhísí riachtanacha sin a bhainistiú agus a sholáthar, chun a chinntiú gurb é ár bplean an plean is oiriúnaí don réigiún."

“Beidh an bonneagar criticiúil sin mar bhonn agus mar thaca ag an bhforbairt eacnamaíoch agus ag soláthar tithíochta, agus an tsláinte phoiblí á cosaint agus an comhshaol á fheabhsú ag an am céanna, rud a chuirfidh ar chumas pobal a bheith rathúil.”

Tá Gaillimh ar an gceantar uirbeach is mó atá ag forbairt in Éirinn le leathchéad bliain anuas agus is príomhthiománaí í d’Iarthar na hÉireann le méadú réamh-mheasta 40% ar a daonra sa tréimhse idir 2022 agus 2040. Mar thoradh ar an bhfás seo, tá dúshlán roimh an mbonneagar fuíolluisce coinneáil suas leis an éileamh méadaithe ar thalamh nua seirbhísithe le haghaidh tithíochta, forbairtí tráchtála agus tionscail. 

Cuirfidh an straitéis deiridh leis an gclár infheistíochta atá ag Uisce Éireann cheana féin i nGaillimh as ar eascair ionaid chóireála fuíolluisce úrnua agus bonneagar nua sa Spideál agus in Ahascragh, rud a chuir deireadh le sceitheadh séarachais amh. Tá uasghráduithe ar siúl i mBaile Átha an Rí chomh maith, agus tá uasghráduithe beartaithe do Chnoc Bellew agus An Chúirt Uachtarach. Déanfar dul chun cinn ar na tionscadail sin trí na timthriallta infheistíochta atá ann faoi láthair agus a bheidh ann amach anseo, faoi réir formheasa agus pleanála.

Is tionscadal tábhachtach é seo do mhuintir na Gaillimhe agus tagann sé ag pointe cinniúnach don cheantar ina bhfuil fás an-suntasach ag eascairt as rath eacnamaíoch Cheantar Cathrach na Gaillimhe agus na gceantar máguaird. Tá sé mar aidhm ag Straitéis Fuíolluisce na Gaillimhe straitéis fuíolluisce inbhuanaithe a sholáthar a chosnóidh sláinte an phobail, a chaomhnóidh ár gcomhshaol agus a éascóidh fás eacnamaíoch agus sóisialta suas go dtí 2080.