Gealltanais go mbeidh soláthar feabhsaithe uisce in Indreabhán an samhradh seo
Tá tús curtha ag Uisce Éireann le hoibreacha chun príomhlíonra uisce a chur isteach in áit an tseanchinn i gCnocán Mhaicín, Indreabhán le gur féidir uisce slán, sábháilte agus iontaofa a chur ar fáil. Is ríthábhachtach na hoibreacha iad seo chun uisce a chaomhnú, an acmhainn is luachmhaire dá bhfuil againn, agus cinnteoidh siad nach bpléascfaidh a oiread sin píopaí amach anseo, rud gur mhinic roimhe seo a tharla cur isteach ar an soláthar uisce nó é a bheith as feidhm dá bharr.
Tá Gerry O'Donnell, Ceannasaí Réigiúnach an Chláir um Sceitheadh a Laghdú, ag tnúth lena chinntiú go mbeidh bristeacha níos lú ann sa soláthar uisce do chustaiméirí in Indreabhán ón samhradh seo ar aghaidh.
"Trí obair a dhéanamh i gcomhpháirtíocht le Comhairle Contae na Gaillimhe, thug muid tús áite do na hoibreacha laghdaithe sceite sin sna ceantair is mó gá leo. Is é is cuspóir leis an tionscadal seo ná thart ar 650m de phríomhlíonra uisce caite a athsholáthar. Tá píopaí nua á gcur isteach chun dul i ngleic le brú uisce, le fadhbanna soláthair agus sceite a chuireann isteach ar roinnt bailte agus gnólachtaí i gceantar Indreabháin."
Dúirt Gerry: Lena chinntiú go dtáirgtear uisce óil sábháilte agus iontaofa gach lá i gContae na Gaillimhe, ní mór an méid uisce cóireáilte, glan a chailltear trí sceitheadh a laghdú. Tá Uisce Éireann tar éis 414m de phríomhlíonra uisce nua a chur isteach in áit sean-phríomhlíonra a bhfuil damáiste déanta dó sa Lochán Beag, Indreabhán. Ba mhaith linn buíochas a ghabháil le custaiméirí as comhoibriú agus as leanúint de bheith foighneach linn fad is atáimid i mbun an soláthar uisce ar fud an chontae a uasghrádú agus a fheabhsú."
Áireofar leis na hoibreacha freisin naisc seirbhíse uisce nua a leagan síos ón bpríomhlíonra poiblí sa bhóthar chuig teorainneacha réadmhaoin na gcustaiméirí agus é a nascadh le soláthar uisce na gcustaiméirí. Sa chás go bhfuil na naisc seirbhíse ar thaobh an phobail déanta as luaidhe, cuirfear cinn nua isteach ina n-áit mar chuid den obair feabhsúcháin seo.
Is é Farrans Construction a thabharfaidh faoi na hoibreacha thar ceann Uisce Éireann agus tabharfar na hoibreacha chun críche faoi dheireadh mhí na Bealtaine. Beidh bainistíocht tráchta i bhfeidhm chun na hoibreacha a éascú ach ligfear do thrácht áitiúil agus éigeandála i gcónaí.
Cuidíonn an Clár Laghdaithe Sceite Náisiúnta chun soláthar uisce níos iontaofa a sholáthar don phobal in Éirinn, chun sceitheadh ar leibhéal ard a laghdú agus cáilíocht an uisce a fheabhsú. Ó 2018 i leith, is ionann an méid seo a chur i gcrích agus breis is €500 milliún a infheistiú chun uasghrádú a dhéanamh ar an líonra uisce faoi thalamh ar fud na tíre. Tá €250 milliún sa bhreis á infheistiú ag Uisce Éireann freisin gach bliain go dtí deireadh na bliana 2030 - chun sceitheadh a dheisiú agus píopaí a athsholáthar le gur féidir soláthar uisce níos iontaofa a chur ar fáil.
D'fhonn tuilleadh a fháil amach, tabhair cuairt ar: https://www.water.ie/projects/national-projects/leakage-reduction-programme/.
Tá líne chúram custaiméirí Uisce Éireann ar oscailt 24/7 ar 1800 278 278 agus is féidir le custaiméirí a bhfuil ceisteanna ar bith acu dul i dteagmháil linn ar Twitter @IWCare. Le haghaidh nuashonraithe faoi chúrsaí áitiúla, tabhair cuairt ar an rannán Nuashonruithe faoi Sholáthar Uisce ar shuíomh gréasáin Uisce Éireann nó socraigh d'áit ar ár suíomh gréasáin.