Leanann Uisce Éireann de sceitheadh a laghdú ar fud na Gaillimhe agus uasghráduithe breise ar an mbealach don Pháirc
Tá daingniú an tsoláthair uisce i nGaillimh fós ina phríomhthosaíocht d'Uisce Éireann de réir mar a leanann an feachtas tréan de sceitheadh a laghdú agus den soláthar uisce do bhailte agus do ghnólachtaí a fheabhsú. Tá lúcháir ar Uisce Éireann chun a fhógairt go bhfuil oibreacha athsholáthair ar thimpeall 577m de phríomhphíobáin uisce aosta agus dhamáistithe chun tosú an tseachtain seo sa Pháirc feadh an R53947 agus an R336.
Thar am, is féidir le píobáin atá ag dul in aois dul i bhfeidhm go suntasach ar cháilíocht an uisce, ar leibhéil sceite, agus ar bhrú. Trí phíobáin nua a chur in ionad na seanphíobán damáistithe sin laghdófar go mór na hardleibhéil sceite, na bristeacha, agus an brú íseal a théann i bhfeidhm ar chustaiméirí.
Tá Clárbhainisteoir do Chlár Náisiúnta Laghdaithe Sceite Uisce Éireann, Gerry O'Donnell, ag súil le criúnna a chur ar an láithreán an tseachtain seo, agus dúirt sé freisin: "Tá daingniú an tsoláthair uisce i nGaillimh ina thosaíocht d'Uisce Éireann agus is breá liom le feiceáil go mbeidh an obair sin ag tosú lena ndéanfar an riosca de bhristeacha ó phléascthaí a laghdú anois agus amach anseo. Mar gheall ar níos lú pléascthaí agus ar sceitheadh níos lú beidh soláthar níos láidre agus níos seasmhaí ar fáil do bhailte agus do ghnólachtaí."
Dúirt Gerry freisin: "Thug Uisce Éireann tús áite maidir le hinfheistíocht agus athsholáthar don chuid seo de na príomhphíobáin uisce de bharr na haoise agus an reachta dá gcuid a bhí ag éirí níos measa, agus mar thoradh air sin tharla bristeacha ar an soláthar do bhailte agus do ghnólachtaí. Nuair a bheidh sé críochnaithe, laghdófar sceitheadh go mór leis an tionscadal seo agus cuirfear soláthar uisce níos inbhuanaithe agus níos iontaofa ar fáil do chónaitheoirí áitiúla do na glúnta le teacht. Ba mhaith liom mo bhuíochas a ghabháil leis an bpobal áitiúil roimh ré as a bhfoighne agus a gcomhoibriú le linn na n-oibreacha. Tá a fhios againn ó thaithí roimhe seo go sárófar an mhíchaoithiúlacht ghearrthéarmach ag na tairbhí fadtéarmacha."
Déanfar limistéir na hoibre a theorannú do chodanna gairide d'fhonn an iarmhairt ar chustaiméirí a íoslaghdú. Beidh bainistíocht tráchta i bhfoirm dúnadh bóthair i bhfeidhm feadh an R53947 agus beidh córas soilse tráchta dhá threo riachtanach feadh an R336 le linn na tréimhse seo chun ligean do chur i gcrích sábháilte agus éifeachtúil na n-oibreacha. Cuirfear sruthanna tráchta ar mhalairt slí i rith dhúnadh an bhóthair. Coimeádfar trácht áitiúil agus éigeandála i gcónaí.
Baineann na hoibreacha le naisc seirbhíse uisce nua a leagan síos freisin ón bpríomhphíobán uisce poiblí sa bhóthar chuig teorainneacha réadmhaoine na gcustaiméirí agus é a nascadh le soláthar uisce na gcustaiméirí. D'fhéadfadh roinnt bristeacha gearrthéarmacha ar an soláthar a bheith i gceist leis na hoibreacha agus tuigimid go bhféadfadh siad cur isteach ar dhaoine, ach cinnteoidh foireann an tionscadail, áfach, go dtabharfar fógra 48 n-uair a chloig ar a laghad do chustaiméirí roimh chur isteach ar bith atá beartaithe ar an soláthar uisce.
Is é Farrans Construction a chuirfidh an tionscadal i gcrích thar ceann Uisce Éireann agus táthar ag súil go gcríochnófar é i mí Iúil.
Bíonn castacht ag baint le sceitheadh a dheisiú uaireanta, ach tá dul chun cinn á dhéanamh againn. Sa bhliain 2018, ba é 46% an ráta sceite náisiúnta, faoi dheireadh na bliana 2021 bhí sé íslithe go dtí 38%. Táimid ag súil go n-éireoidh linn ráta sceite náisiúnta de 25% a bhaint amach faoi dheireadh na bliana 2030. Chun tuilleadh faisnéise a fháil, tabhair cuairt ar www.water.ie/reducingleaks.
Tá líne chabhrach um chúram do chustaiméirí Uisce Éireann ar oscailt 24/7 ar 1800 278 278 agus is féidir le custaiméirí a bhfuil ceisteanna ar bith acu dul i dteagmháil linn freisin ar Twitter @IWCare. Le haghaidh nuashonruithe, tabhair cuairt ar chuid Nuashonruithe ar Sholáthar Uisce de www.water.ie.
Tá Uisce Éireann freagrach as seirbhísí uisce agus fuíolluisce poiblí uile in Éirinn a sheachadadh. Táimid tiomanta do bhonneagar criticiúil a uasghrádú agus a fhorbairt ar bhonn leanúnach chun tacú leis an bhfás atá riachtanach i dtithíocht agus ar fud ár ngeilleagair, agus an comhshaol á chosaint agus soláthairtí uisce á gcosaint.